Sumarstarf félagsmiðstöðva fyrir unglinga f. ´02-´04

Hverfi: 
Miðborg og Hlíðar, Vesturbær
Efnisflokkur: 
Félagsmiðstöð, Æskulýðsstarf
Tímabil: 
júní 2018, júlí 2018
Aldur: 
13 ára, 14 ára, 15 ára, 16 ára

Í sumar bjóða almennu félagsmiðstöðvar Tjarnarinnar (100og1, 105, Frosti og Gleðibankinn) upp á opnanir, viðburði og allskonar fjör júní og í byrjun júlí. Öll starfsemin og viðburðir verða auglýstir á facebook síðum félagsmiðstöðvanna og öðrum samfélagsmiðlum. Einnig verður upplýsingapóstur sendur út til foreldra í gegnum Mentor í lok maí. Hofið, sértæk félagsmiðstöð verður með sumarstarf fyrir börn og unglinga með fötlun en nánari upplýsingar um starfsemi Hofsins má finna hér

Almennar opnanir fyrir alla unglinga í hverfinu verða haldnar í Gleðibankanum við Hlíðaskóla og Frístundamiðstöðinni Tjörninni við Frostaskjól á mánudags- og miðvikudagskvöldum auk þess sem sérstakar pop-up opnanir verða víðsvegar um hverfið á sama tíma. Pop-up þýðir að starfsfólk mun setja upp félagsmiðstöð víðs vegar um hverfin, eftir veðri og vindum og mun það vera auglýst vel til unglinganna gegnum samfélagsmiðla. Sumarráð unglinganna mun funda á mánudögum og miðvikudögum í sumar og skipuleggja allt starfið.

Síðdegisopnanir fyrir unglinga verða á mánudags- og miðvikudagskvöldum frá 16.30 - 18.30.

Föstudagarnir eru óráðnir, en sumarráð, þátttakendur í starfinu og starfsfólk mun ákveða í sameiningu hvernig dagskráin verður þá daga. Styttri dagsferðir, hópastarf, sundferðir eða hvað sem er, í raun hvenær sem er á föstudögum.

Götustarf er það kallað þegar ekki er um skipulagðar opnanir að ræða heldur munu starfsmenn félagsmiðstöðvanna rölta um þau svæði sem unglingarnir kunna að vera á. Markmiðið er að vera til staðar, veita umhyggju, stuðning og eftirlit. Götustarfið er áætlað milli 21.00 og 00.00 eða lengur, eftir aðstæðum.

Með starfsemi félagsmiðstöðva er verið mæta þörfum unglinga fyrir fjölbreytt frítímastarf og samveru með jafnöldrum. Rannsóknir sýna að þátttaka í skipulögðu frítímastarfi hefur mikið forvarnargildi og styrkir unglinga til virkari þátttöku í samfélaginu. Starfsemi félagsmiðstöðva miðar að því að bjóða öllum unglingum valkost í frítímanum undir handleiðslu hæfra starfsmanna. Félagsmiðstöðvar eru því mikilvægur vettvangur fyrir ófélagsbundna unglinga.

Ef einhverjar spurningar vakna leitið til Tjarnarinnar frístundamiðstöðvar  411-5700,  á heimasíðu Tjarnarinnar (www.tjornin.is) og á www.fristund.is.

Deildarstjóri unglingastarfs: Andrea Marel andrea.marel@reykjavik.is 

Síðast uppfært: 
Miðvikudagur, 16. maí 2018 - 17:38