Tónstofa Valgerðar var stofnuð árið 1987. Í Tónstofunni fer fram tónlistarkennsla fyrir nemendur sem geta ekki tileinkað sér hefðbundna tónlistarkennslu.
Tónstofan er eini tónlistarskólinn á landinu þar sem nemendur með sérþarfir njóta forgangs. Öll kennslan tekur mið af forsendum og þörfum hvers einstaks nemanda. Nemandi í Tónstofunni getur lagt stund á hefðbundið tónlistarnám. Hann getur einnig notið fjölþættrar tónlistarkennslu og þjálfunar sem beinist að því að efla tónnæmi hans og tónlistarfærni, bæta líðan hans og veita sköpunarþörfinni útrás. Í þessu felst sérstaða Tónstofu Valgerðar um leið og hún fylgir þeim meginmarkmiðum sem eru skilgreind í aðalnámskrá tónlistarskóla og skólanámskrá Tónstofunnar.
Kennsla fer fram í einstaklingstímum og fámennum hópum. Bjöllukór er starfræktur svo og söng- og hljóðfærahópar. Tónstofa Valgerðar er viðurkenndur tónlistarskóli. Tekið er við umsóknum um skólavist á öllum tímum.
Sækja þarf um skólavist í Rafrænni Reykjavík www.reykjavik.is og með því að senda tölvupóst á netfangið tonsvj@mmedia.is
Hægt er að fá nánari upplýsingar um starfið á heimasíðu skólans www.tonstofan.is og á skrifstofu hans.