KFUM og KFUK á Ísland er með umfangsmikið og fjölbreytt starf fyrir börn og unglinga. Á veturnar fer fram barna- og unglingastarf í um 40 deildum víða um land sem halda fundi einu sinni í viku. Íþróttamót, hátíðir og leiðtogaþjálfun eru fastur liður í starfinu ásamt styttri og lengri vettvangsferðum. Einnig reka KFUM og KFUK á Íslandi leikskólann Vinagarð.
Á sumrin taka við sumarbúðirnar Vatnaskógur, Vindáshlíð, Kaldársel, Hólvatn og Ölver þar sem hægt er að dvelja í dvalarflokkum. Einnig eru leikjanámskeið í Kópavogi, Reykjanesbæ og í Kaldárseli mjög vinsæl á sumrin.
KFUM og KFUK á Íslandi eru frjáls félagasamtök sem starfað hafa á Íslandi frá árinu 1899. Markmiðið er að bjóða uppá metnaðarfullt æskulýðsstarf þar sem lögð er áhersla á aukinn þroska líkama, sálar og anda.